ҚР ұлттық статистика бюросының берген мәліметі бойынша биыл ақпанда Қазақстандағы зауыттар жалпы құны 151,6 млрд теңге болатын барлық типті 11 282 бірл. автокөліктер құралын өндірді. Бұл қаңтардағыдан – 17,4%, былтырғы ақпан нәтижесінен 3,2% төмен көрсеткіш.

Жалпы екі айда 278,3 млрд теңгеден жоғары сомаға 20 888 бірл. (2024 жылғы сәйкес сол кезеңмен салыстырғанда -9,3%) көлік құралы шығарылды. Әдеттегідей, көбісі жеңіл автокөліктер – 19 285 бірл.        (-7,7%). Жүк автомобильдерінің саны – 673 бірл. (-39,3%), автобустар саны – 297 бірл. (-36%). Одан бөлек 532 бірл. тіркеме мен жартылай тіркеме және 101 бірл. басқа арнайы техникалар жасалды. Машинажасау саласындағы автоөнеркәсіптің үлесі екі айда 40,5% құрады.

Анар МАҚАШЕВА, ҚАО президенті: «Қазір отандық автоиндустриядағы басты тренд – локализацияны дамыту. Мұнда автозауыттар меңгеріп алған шанақ дәнекерлеу және сырлау сияқты күрделі технологиялық операциялар туралы ғана сөз болып отырған жоқ. Қазақстанда жасалған автокомпоненттерді пайдалану да маңызды. Қазір бірнеше өңірде бөлшек және керек-жарақ шығаратын өнеркәсіп кластерлері құрылды. Бұл біз Қазақстан автоөнеркәсібі үшін стратегия ретінде таңдаған жол. Локализация аса маңызды, себебі мемлекет жаңа өндіріс орындары мен технологияларға қолдау көрсетуге дайын. Бірақ нақты міндеттер де бар. Мысалы, 2025 жыл қорытындысы бойынша автокөлік өндірушілер кем дегенде 30% өнімін майда торапты әдіспен (CKD) құрастыруға тиіс».

2025 жылдың алғашқы екі айында Қостанайда (Allur) 11 030 бірл. техника жасалды (-13,4%). Алматыдағы кәсіпорындар (Hyundai Trans Kazakhstan, Hyundai Trans Almaty) 8 536 жеңіл және коммерциялық автокөліктерді шығарды (+11,5%). Семейде (СемАЗ, Daewoo Bus Kazakhstan) 339 бірл. коммерциялық техникасы конвейерге тұрды (-62,6%). Қарағандыдағы зауыт (QazTehna) мамандары 262  техника құрастырса (+8,3%), Көкшетаудағы КАМАЗ-Инжиниринг клиенттеріне 132 бірл. коммерциялық техника жөнелтті (-22,4%). Басқаларының нәтижесі – 589 бірл.

Биылғы қаңтар мен ақпанда көптеп шыққан бес бренд тізіміне (экспортты қосқанда) Hyundai (8 431 бірл., +10,8%), Chevrolet (4 147 бірл.; +17,7%), Kia (3 442 бірл.; -15,6%), Jetour (2 004 бірл.; -12,6%) және Jac (880 бірл.; -68,1%) кірді. Модельдер арасында Chevrolet Cobalt (3 802 бірл.), Hyundai Tucson (3 011 бірл.), Hyundai Mufasa (1 792 бірл.), Kia Sportage (1 658 бірл.), Jetour X50 (963 бірл.), және Hyundai Santa Fe (955 бірл.) басым.