Соңғы бірнеше күндері автокөліктердің әйнегіне қараңғылау жасау тақырыбы БАҚ пен әлеуметтік желілерде қайтадан қызу талқылануда. Біз бұл мәселенің мән-жайын анықтап, жол қозғалысы қауіпсіздігіне қалай әсер ететінін сараптап көрдік. Материал «QazAutoStandard» автокөлік сарапшылары мен аудиторлар қауымдастығының президенті Ербол Сейпіловпен бірлесіп дайындалды.

Қазірдің өзінде нені білу қажет?

Қазақстан Республикасының қолданыстағы жол қозғалысы қағидаларына (ІІМ-нің 2023 жылғы 30 маусымдағы №534 бұйрығы) сәйкес, жүргізушінің көріну аймағын шектейтін немесе жарақат қаупін тудыратын заттарды автокөлікке орнатуға тыйым салынады.

Тек мына заттарға рұқсат етіледі:

- сыртқы артқы көрініс айналары;

- әйнек сүрткіштер;

- әйнекке орнатылған антенналар мен жылытқыштар;

- терезе дефлекторлары.

Алдыңғы әйнекке қараңғылау жасауға тікелей тыйым салынбаған, бірақ бұл оны шектеусіз қолдануға болады дегенді білдірмейді.

Қолданылатын нормалар:

- Кеден одағының техникалық регламенті ТР ТС 018/2011

- ГОСТ 33670-2015

Сәулені өткізу талаптары:

- Алдыңғы және алдыңғы бүйірлік әйнектер үшін кемінде 70%;

- Алдыңғы әйнектің жоғарғы жағында жарық қорғайтын жолағы рұқсат етіледі - 14 см-ге дейін;

- Пленка ақ, сары, қызыл, жасыл және көк түстерді бұрмаламауы тиіс;

- Айна жабынына тыйым салынады.

Сарапшы не дейді?

«QazAutoStandard» автокөлік сарапшылары мен аудиторлар қауымдастығының президенті Ербол Сейпіловтың пікірінше, алдыңғы әйнектерге қараңғылау жасауға рұқсат бермес бұрын мыналарды алдын ала қарастыру қажет:

- пленканың сапасын бақылау механизмін әзірлеу;

- жарықты өткізу талаптарына (кемінде 70%) сәйкестікті қамтамасыз ету;

- сәйкестікті растау үшін техникалық тексеру немесе аккредиттелген зертханаларда сынақтан өту тәртібін енгізу.

Сарапшының айтуынша, климаты ыстық елдердің тәжірибесі көрсетіп отырғандай, қараңғылау келесі артықшылықтарға ие:

- ультракүлгін сәулелердің әсерін азайтады;

- дененің қызып кетуінен қорғайды;

- салон ішін сырттан көрінбейтін етіп, ұрлық қаупін азайтады;

- жол-көлік оқиғасы кезінде әйнек сынықтарын ұстап тұру арқылы жарақат алу қаупін төмендетеді.

Алайда бұл артықшылықтардың барлығы заң талаптары қатаң сақталған жағдайда ғана іске асады.

Жарық өткізу нормаларын бұзу - жүргізушінің алдыңғы көрінісін нашарлатып, жол-көлік оқиғаларының қаупін арттырады. Сондықтан кез келген өзгерістер мемлекеттік органдар тарапынан нақты бақылау және басқару жүйесімен бірге жүруі тиіс деп санайды сарапшы.