ҚР Ұлттық статистика бюросының берген мәліметі бойынша қазан айында Қазақстанда жалпы құны 189,8 млрд теңгені құрайтын 14 885 бірл. техника жасалған. Өндіріс көлемі былтырғы қазанға қарағанда 2,8% ұлғайды. Жалпы он айда елдегі зауыттар 107 128 бірл. техника құрастырды, оның ішінде жеңіл автомобиль саны – 96 554 (-14,4%), жүк көліктері – 6 404 (-14,7%), автобустар – 2 207 (-3,1%). Сонымен қатар жалпы құны 1,39 трлн теңге болатын 1 504 бірл. тіркеме мен жартылай тіркеме және 459 бірл. басқа арнайы техника жасалды.

Анар МАҚАШЕВА, ҚАО президенті: «Майда торапты өндірісті дамытуға инвестиция құю дегеніміз, жаңа жұмыс орындары, жаңа технологиялық құзыреттер. Қазақстан автоөнеркәсібі әлемдегі жағдай ушығып тұрған шақта да тұрақтылығын көрсетіп, белсенді дамып келеді».

«Қазақстанның Автокөлік Одағы» (ҚАО) берген ақпаратына сәйкес 2024 жылдың он айында Қостанайда (Allur) 66 037 бірл. техника шықты (-11,8%). Алматыдағы кәсіпорындар (Hyundai Trans Kazakhstan, Hyundai Trans Almaty) 32 584 бірл. жеңіл және коммерциялық автомобиль өндірді (-22,9%). Семейде (СемАЗ, Daewoo Bus Kazakhstan) 4 197 бірл. коммерциялық техника конвейерге тұрса (+26,1%), Қарағанды облысындағы QazTehna клиенттеріне 1 140 бірл. техника жөнелтті (-6,4%). Көкшетаудағы мамандар (КАМАЗ-Инжиниринг) 975 бірл. коммерциялық техника құрастырды (-4,2%). Басқаларының нәтижесі – 2 165 бірл. техника (+9,3%).

Елде қаңтар мен қазан аралығында аса танымал болған бес бренд: (экспортты қосқанда) Hyundai (31 957 бірл.), Chevrolet (24 957 бірл.), Kia (20 135 бірл.), Jac (10 772 бірл.) және Jetour (8 680 бірл.). Модельдер арасында Chevrolet Cobalt (21 126 бірл.), Hyundai Tucson (16 401 бірл.), Kia Sportage (7 452 бірл.), Hyundai Elantra (4 606 бірл.) және Jetour X70 (4 275 бірл.) көп.