• 2024 жылы ел тұрғындары 205 111 жаңа жеңіл және коммерциялық автомобильдерді сатып алды
• Үздік 5 бренд: Hyundai, Chevrolet, Kia, Chery, Jac

«Қазақстанның Автокөлік Одағы» (ҚАО) берген мәліметі бойынша былтыр ресми дилерлер 205 111 жаңа автомобильдің кілтін тапсырды (+3,2%). Бұл 2023 жылдың төртінші тоқсандағы сатылымдардың қарқынды өсуімен салыстырмалы ұқсас. Желтоқсанда 25 570 көлік өткен, бұл 2023 жылғы сол аймен салыстырғанда 8,6% жоғары көрсеткіш. Биылғы сауда – Қазақстан авторитейлінің тарихындағы ең жақсы нәтиже.

Анар МАҚАШЕВА, ҚАО президенті: «Бастапқыда сауда аз болғанымен, 2024 жылы бәсеке күшейіп, өндірушілер мен дилерлер тиімді ұсыныстарды көптеп жасады. Үкімет, Қаржы нарығын реттеу агенттігі, екінші деңгейлі банктер мен микроқаржы ұйымдары бірлесе жұмыс атқарып, бастапқы жарнаның болмауы, бөліп төлеу мүмкіндігі сияқты қаржыландыру шараларын жүзеге асырды. Сатып алушыларға жақсы жағдай жасалды. Мұның нәтижесі де көп күттірген жоқ. Автомобиль нарығы екінші жыл қатарынан рекорд жасап келеді».

2024 жылы Қазақстандағы ең танымал көліктер арасында екінші рет Hyundai (нарықтағы үлесі 21,6%) жеңімпаз атанды. Қаңтар мен желтоқсан аралығында брендтің 44 218 автомобилі өтті, көбін Алматыдағы кәсіпорындар құрастырған (былтырғы нәтижемен салыстырғанда -5,4%). Екінші орын Қостанайдағы Chevrolet еншісінде (30 927 бірл.; -32,5%). Үшінші орын 23 045 өнімі иесін тапқан Kia-ға бұйырды (-9,6%). Ал Chery бұл жолы төртінші орынға тұрақтады (14 883 бірл.; +21,7%). Бұрын жетінші қатарда тұрған қостанайлық Jac бесінші сатыға көтерілді (11 771 бірл.; +56,7%). 11 045 машинасы саудаланған Toyota алтыншы орынды қанағат тұтты (+2,7%). Жетінші қатарға жайғасқан Haval-дың дилерлері 10 983 машина сатты (+45,3%). Бұдан бөлек табысты брендтер ондығына Jetour (9 507 бірл.; +141,9%), Changan (8 510 бірл.; +39,8%) және Geely (8 252 бірл.; +126,5%) кірді.

Қазақстан автонарығында Қытай брендтерінің үлесі артып, соңғы төрт жылда 39%-ға жетті, әлі де саудасы қызып тұр. Бұл әлемдік үрдіс, қазір Қытай ең ірі автоөндірушіге айналды. Дәстүрлі қозғалтқышпен жүретін көліктерден бөлек нарықта гибрид және электромобиль бар. Ең танымал электрлі машина – Zeekr, ресми сатушылар бір жылда 809 электромобиль сатқан. Биыл BYD ресми саудасын бастады.

Анар МАҚАШЕВА, ҚАО президенті: «Жалпы нарықта сатып алушылардың брендтерге де, модельдерге де қатысты талғамы өзгергені байқалды. 2025 жылы нарық құрылымы өзгеріп, жергілікті өндіріс қарқынды дамиды деп күтіп отырмыз, себебі модельдік қатар кеңейіп жатыр».

2024 жылғы ең танымал 10 модель қатарын әдеттегідей Chevrolet Cobalt (26 537 бірл.), Hyundai Tucson (22 389 бірл.) және Kia Sportage (8 834 бірл.) бастап тұр. Сонымен қатар тізімде Hyundai Elantra (6 520 бірл.), Chery Tiggo 2 (5 310 бірл.), Haval M6 (5 185 бірл.), Chery Tiggo 7 Pro (4 907 бірл.), Jac J7 (4 585 бірл.), Hyundai Santa Fe (4 423 бірл.) және Kia Sorento (4 208 бірл.) бар.

ТОП-20: 2024 ЖЫЛҒЫ ЖЕЛТОҚСАНДАҒЫ ЖЕҢІЛ ЖӘНЕ КОММЕРЦИЯЛЫҚ АВТОМОБИЛЬДЕРДІҢ САУДАСЫ