• Автомобиль және коммерциялық техника өндірісі 22,8% ұлғайды.

«Қазақстанның Автокөлік Одағы» (ҚАО) берген мәлімет бойынша 2024 жылдың алғашқы айында Қазақстанда жалпы құны 149,1 млрд теңге құрайтын 11 220 автокөлік құралы зауыттан шықты. Ал былтыр сол уақытта жалпы бағасы 101,6 млрд теңге болатын 9 135 техника жасалған (+22,8%). Машинажасау саласындағы автоөнеркәсіп үлесі 57%-ға жетті.

Қаңтарда 10 287 жеңіл машина (+22,8%), 551 жүк көлігі (-3,5%), 240 автобус (+124,3%), 72 жартылай тіркеме және тіркеме, сонымен қатар 70 арнайы техника конвейерден түсті.

Аталған айда ең көп (жалпы үлесі 92%) көлік құрастырған – Қостанайдағы Allur (6 204; +28,3%) мен Алматыдағы Hyundai Trans Kazakhstan (4 117; +14,9%). Семейде орналасқан СемАЗ зауыты 350 коммерциялық техника шығарды. Қарағанды облысындағы QazTehna мамандары 125 техника өндірді. Көкшетаудағы КАМАЗ-Инжиниринг клиенттеріне 100 жүк көлігін жөнелтті. Daewoo Bus Kazakhstan мен Hyundai Trans Almaty сәйкесінше 88 және 10 техника құрастырды.

Биыл қаңтарда отандық кәсіпорындар ең көп өндірген бес жеңіл көлік бренді (экспортты қосқанда): Hyundai (4 117), Kia (2 185), Chevrolet (1 809), Jac (1 234) және Jetour (939).

Анықтама:

«Қазақстанның Автокөлік Одағы» (ҚАО) – «Казахстанский Автомобильный Союз» заңды тұлғалар бірлестігі – 2023 жылдың 21 шілдесінде Астанада құрылған коммерциялық емес құрылым.

ҚАО құрамына Қазақстанның автоөндірушілер қауымдастығы; Қазақстанның автокомпонент өндірушілері қауымдастығы; Қазақстанның дилерлер қауымдастығы; Қазақстанның жүрген автомобильдерді сату бойынша қауымдастығы; Қазақстанның автосарапшылар және аудиторлар қауымдастығы (автомобильжасау өнімдерінің сәйкестігін бағалау) кірді.

«Қазақстанның Автокөлік Одағы» баспасөз қызметі

E-mail: press@kao.kz
+7 701 770 0257 Дина Букенбаева